लागू औषध सहित हेटौँडाका एक युवक पक्राउ

७ जेष्ठ २०७६, मंगलवार १७:२९

मकवानपुर, ७ जेठ । नाईट्रोभेट सहित अन्य विभिन्न लागु औषधसहित हेटौँडाका एक युवक पक्राउ परेका छन् । मकवानपुरको हेटौँडा उपमहानगरपालिका वडा नम्बर ११ बस्ने ३० वर्षीय शोमनाथ फुयाँललाई लागु औषध ओनरेक्स १०० एमएलको ५ बोतल, नाईट्रोभेट १० ट्याब्लेट र सिम्प्लेक्स सी लेखेको १० ट्याब्लेट सहित सोमबार पक्राउ गरेको हो ।

सोमबार पक्राउ परेका फुयाँललाई प्रहरीले आज सार्वजनिक गरेको हो । हेटौँडा उपमहानगरपालिका वडा नम्बर १५ रातोमाटेस्थित सडकखण्डमा जाँचका क्रममा उनलाई पक्राउ गरिएको हो । प्रहरीका अनुसार सोमबार साँझ साढे ६ बजेको समयमा ईलाका प्रहरी कार्यालय पशुपतिनगरबाट प्रहरी निरिक्षक अरुण कुमार कुशवाहाको कमाण्डमा खटिएको चेकिङ टोलिले रातोमाटे स्थित सडकखण्डमा जाँचको क्रममा बिरगंजतर्फबाट हेटौँडातर्फ आउँदै गरेको ना.१ ज १७२२ नम्बरको यात्रुवाहक माईक्रो गाडीलाई रोकी जाँच गरेको थियो । सो गाडीमा सवार शोमनाथ फुयाँलको साथबाट लुकाई छिपाई ल्याइएको उक्त लागुऔषधहरु प्mेला परेको थियो ।

फुयाँलमाथि लागु औषध सहित नियन्त्रणमा लिई आवश्यक अनुसन्धान तथा कारबाही भइरहेको प्रहरीले जनाएको छ । उनी दोषी देखिएमा लागू औषध नियन्त्रण ऐन, २०३३ बमोजिम २ वर्ष देखि १० वर्ष सम्म कैद र १ लाख देखि २० लाख सम्म जरिवाना हुनसक्ने प्रहरीले जनाएको छ ।