यसरी गरियो हेटौँडासहित जिल्लाभरिकै नापतौल यन्त्रको दर्ता तथा नविकरण

६ जेष्ठ २०७६, सोमबार १६:१७

मकवानपुर, ६ जेठ । नापतौल क्षेत्रीय कार्यालय विरगंजले मकवानपुर जिल्लाका व्यावसायीहरुको नाप्ने तौलने यन्त्रहरु नविकरण तथा दर्ता गर्ने कार्य सम्पन्न गरेको छ । गत बैशाख २९ गतेदेखि जेठ ३ गतेसम्म खटिएको टोलीले दर्ता तथा नविकरण कार्य सम्पन्न गरेको हो । यस अवधिमा जिल्लाका २ सय ८० जना पुरानो व्यवसायीहरुको नापतौल यन्त्र नविकरण र ४९ जनाले नया दर्ता गरेको मकवानपुर उद्योग वाणिज्य संघले जनाएको छ ।

व्यवसायीहरुको नापतौल यन्त्र नविकरण तथा दर्ताबाट सरकारलाई रु १ लाख ८ हजार ४ सय ५५ रुपैयाँ राजश्व समेत संकलन भएको संघले जनाएको छ । कुनै व्यवसायीहरुले व्यवसाय सुरु गर्दा नाप्ने तौलने यन्त्रहरु खरिद गरिएको ३५ दिन भित्र दर्ता गरी सक्नु पर्ने प्रावधान छ । नियमित रुपमा तोकिएको समयमा नविकरण समेत गर्नु पर्ने हुन्छ । यसका लागि हरेक वर्ष मकवानपुर उद्योग वाणिज्य संघले नविकरण तथा दर्ताकार्यको सहजिकरण गर्दै आएको छ । तर प्रदेशनै फरक भैसक्दा पनि नापतौल कार्यालय विरगंजकै टोलीवाट यसरी वर्षमा ६ दिन मात्र समयम दिँदा नाप्ने तौलने यन्त्रहरु स्ट्याण्डर्ड अवस्थामा रहे नरहेको यकिन गर्न समस्या रहेको समेत संघले जनाएको छ ।

मकवानपुरका सबै व्यवसायीहरुले यस सम्वन्धी जानकारी र पहँुच नपाउँदा समस्या पनि देखिएको बताइएएको छ । राज्यले नापतौल यन्त्र दुरुस्त हुनुपर्ने गरी कठोर कानून बनाए पनि नियमित नापतौल यन्त्र जाँच दर्ता तथा नविकरणको लागि कम्तिमा एक स्थानीय तहमा एउटा युनिट रहन आवश्यक देखिएको समेत संघले जनाएको छ ।