बर्षेनी बढ्दो बेरुजु आर्थिक अनियमितता हो–मुख्यमन्त्री पौडेल

२७ मंसिर २०७५, बिहीबार ०९:३३

हेटौंडा, २७ मंसिर । प्रदेश नम्बर ३ का मुख्यमन्त्री डोरमणि पौडेलले हरेक बर्ष बढ्ने बेरुजु खर्च रोक्नुपर्नेमा जोड दिएका छन् । आधारबिना प्रत्येक बर्ष बेरुजु बढ्नु आर्थिक अनियमितता भएको उनले बताए ।

महालेखा परिक्षकको कार्यालयको आयोजनामा बिहिबार भएको लेखा परिक्षण सम्बन्धी छलफलमा बोल्दै उनले जसरी हुन्छ बेरुजी घटाउनुपर्ने बताए । प्रत्येक बर्ष बढ्ने यस्ता खर्चहरुलाई महालेखाले निरुत्साहित गर्नुपर्ने पनि उनको भनाई थियो । प्रदेश सरकारले भ्रष्टाचारमुक्त पारदर्शी सरकारको उद्देश्य लिएको भन्दै मुख्यमन्त्री पौडेलले प्रदेशका खर्चहरुको विवरण जनताले समेत विश्वास गर्ने खालको हुनुपर्ने धारणा राखे । लेखा परिक्षणलाई औपचारीकता पुरा गर्ने मात्र नभई पारदर्शी बनाउनुपर्ने बताए ।

कार्यक्रममा बोल्दै आन्तरिक मामिला तथा कानुन मन्त्री शालिकराम जम्कट्टेलले खर्चको प्रणालीमा केहि समस्या रहेको भन्दै नीतिगतरुपमा सच्याउन आबश्यक रहेको बताए । विभिन्न बहानामा बजेट चुहावट भएको भन्दै यसको नियन्त्रण गर्न आग्रह समेत उनले गरे । भुमि व्यवस्था कृषि तथा सहकारी मन्त्री दावादोर्जे लामाले लेखा परिक्षणको विषयमा अझै पनि धेरैलाई जानकारी नहरेको बताए । कार्यक्रममा बोल्दै महालेपरिक्षक टंकमणि शर्माले धेरै वटा चरण पार गरेपछि मात्र लेखा परिक्षण सम्पन्न हुने भएकोले यसको विषयमा शंका नगर्न आग्रह गरे । सबै खर्चहरुको दुरुस्त कागजात अनुसार नै लेखा परिक्षण हुने उनले जानकारी दिए ।

कार्यक्रममा ३ नम्बर प्रदेशका प्रमुख सचिव आनन्दराज ढकाल, प्रदेश नीति तथा योजना आयोगका उपाध्यक्ष डा. खिमलाल देवकोटा, प्रदेशका मन्त्रालयका सचिवहरु, महालेखा परिक्षकको कार्यालयका प्रतिनधिहरुको सहभागिता रहेको थियो ।
मिस वर्ल्डको ट्यालेन्ट प्रतियोगितामा मिस नेपाल श्रृङ्खला के भईन् ?